[الرّاسم]

اتفق مع اخي بالعربي على مسألة مفترق الطرق ولو اني انصح بالبقاء بنفس الحجم بلا مخاطر، وتقييمي للمرحة السابقة كان جيد جداً لان طموحنا كعرب أكبر من كذا رغم اني اشوف الامور تحسنت كثير وبدت الناس تفهم الفرق بين الويب العربي وبين اي منتدى تطويري آخر

قبل الويب العربي كان اللي يحط سعر خدمه في موضوع ياكلونه اكل الان الامور تحسنت كثير تجارياً وهذي تحسب لصالح الويب العربي

خلال فترة التوقف قريت مشاركات في منتديات ثانيه وتفاجأت بحقد كبير من بعض الاعضاء في هذي المنتديات على الويب العربي بسبب تعرضهم للطرد وكردة فعل للبعض يقوم يسب الويب العربي من باب الانتقام او الحقد على باند اخذه مع اني اشوف ان الباند المؤقت والمستعمل في الويب ممتاز جدا وفكرة جديدة بدأها الويب العربي وقلدها الغير وهذا شي طيب ولا يمنع ان اي عضو وانا اولهم ممكن ياخذ له باند نتيجة خطأ في لحظة غضب مثلا ويريح اعصابه كم يوم ويرجع ما اشوف ان فيها اي شيء سلبي وهذي تحسب للويب العربي

قضايا النصب وما ادراك ما النصب
مشكلة الكثير منا يعتبر اي مشكلة في قضايا ونزاعات مشكلة نصب مع ان اغلبها مشاكل مالها علاقة بنصب واحتيال ولكنها مشاكل طبيعي تصير بين مقدم خدمه وعميل وانا الان توني جاي من مشكلة مطروحة ضدي فهل نحكم عليها انها مشكلة نصب ؟

النصب اني اعرض خدمه واخذ فلوسها واطنش وهذي صارت شبه معدومه في الويب العربي بعد ماكانت بالهبل وهذي تحسب للويب العربي برضوه .

وعندنا ناس مدري وش تكون ؟
اول عرض يجيه يوافق عليه ولا يبي يتعب ويبحث عن الافضل والاكثر ثقه ياخي محرك البحث خمس دقايق في الويب العربي يجيب لك خبر كل شركه فيه اما تجي على عماها وبعدين تجي تلوم الويب العربي اعتقد هذي مافيها انصاف .


هذا اللي راح كله ايجابيات وجدتها في الويب اما السلبيات واتمنى تكون محط اهتمامكم

ادارة الويب العربي تهمل مشاركات مهمه ولا ترد عليها مع ان اغلبها موجه للاداره وهذا شي شين في حقكم وفي حق العضو اللي يكتب لكم ممكن تتفادون هذا الشي ويكون تحت انظاركم عشان ما نقول ما انتبهتوا للمواضيع هذي انكم تحصرونها في قسم للاقتراحات والشكاوي مثلا .

المشرفين الله يعطيهم العافيه مجهودهم واضح لكن بعض الاقسام ما نشوف مشرفينها الا في السنه حسنه يمكن مشغولين مثل كل اعضاء الويب في اعمالهم الخاصة لكن الحل بسيط وهو زيادة عدد المشرفين في بعض الاقسام

وبما اننا جبنا طاري الاقسام الاحظ ان فيه قسمين تعتبر الاولى في النت العربي وماشفتها في اي منتدى ثاني ومهمه كثير لكن يبيلها ناس تنشطها اكثر وهي قسم التجارة الالكترونية وقسم الحمايه
هذي القسمين نتمنى انها تكون مرجع لنا بشكل مستمر نتابع منها كل جديد لاننا نحتاج نتابع التجارة الالكترونية وجديدها ونتابع الثغرات والحماية بشكل مستمر والاعتماد حاليا على نشاط الاعضاء اعتقد غير كافي ويحتاج تعيين مشرفين متخصصين يكون لهم خبره في هالمجالين ومجهود كبير وبعد كذا اتوقع تكون من اهم الاقسام وعلى مستوى النت العربي كله .

اخيرا اتمنى للويب العربي كل التوفيق وسيروا على بركة الله ولا تلتفتوا للسوقه والدهماء بل بالعكس احسن ما سووه انهم مايجون عندنا في الويب ويزعجونا بتفاهاتهم لان الويب العربي ارقى من تفكيرهم وللناس الراقيه فقط .

تحياتي