السلام عليكم
كيف الحال ياشباب
وانا طالع من معمل انفنتي قلت امر اشوف وش الاوضاع برا
بما ان الموضوع ودي وخفيف ظل بدأه ابو حمد
ودي اعلق على نقطة تحديد موعد والتقيد فيه
بصراحة انا كنت ضد تحديد موعد لا تقريبي ولا دقيق وصار نقاش حول هالموضوع في واحد من اجتماعات ابعاد المعلومات الدوريه ولكن كان قرار الاغلبيه بسبب الاقتباسات اللي وضحها عاشق انفنتي محمد نور
طبعاً هي وجهات نظر ممكن تصيب وممكن تخيب لأني ملاحظ بعض الاخوان متمسك برأيه ولا يقبل حتى نقاش فيه ولسان حاله يقول : ( مالي شغل انتوا قلتوا التحديث يوم كذا وما نزلتوه خلاص يالله نزلوه الحين )
طيب يالغالي فيه اسباب منعتنا السالفه مو بسيطه وفيها سمعة وفيها آمال بشر وطموحات عالم
( مالي شغل ليه طيب تعطونا موعد ؟ )
يالحبيب هالامور ما فيها مواعيد
( مو شغلي انا ابي التحديثات وانتوا وعدتوني تخلص وما خلصتوها )
طيب يالغالي مو شغلك بس بالنسبه لنا الشغله مسؤلية في مئات من المواقع حاطين أملهم فيك مستحيل تخذلهم عشان لا يفوت موعد تقريبي !
يعني على بالك خالصين ومانبي ننزله كذا وناسه ؟
ولا تتوقع تركنا شغلنا وفليناها تمشيات ومخيمات في هالبرد ( ليتك تدري اننا في عناء وتعب ليل الله مع نهاره عشان ننجز عملنا ).
يمكن اللذه لما نخلص لكن طول الفتره الماضيه لا والله الا تعب وسهر وضغوط .
كان بعض العملاء يسألني متى تنزل انفنتي الجديدة ؟
ارد عليهم : أول ما تخلص
لان عامل الزمن شيء ما منه مفر للبني آدم طاقة محدده يعني كم ساعه يقدر يشتغل في اليوم ؟ مهما كان عدد الساعات لابد من مرور زمن يكفي لانجاز العمل اللي تبي تسويه يعني وش بتسوي بتختصر وقت وانت هذي طاقتك وهذا حدك ؟ مافيه أمل
نرجع لموضوع تحديد موعد دقيق
برأيي ان تحديد موعد دقيق ممكن يكون في أي شيء غير الاعمال الابداعيه !!
لا ينفهم قصدي غلط مع انها الكلمه العربية اللي توضح فكرتي لكن لانها تستعمل عادة على انه عمل جيد ويقال فلان مبدع يعني عمل شيء ممتاز بينما اللي اقصده انه عمل ابداعي من المخيله الى الواقع .
يعني ممكن تحدد موعد دقيق تقابل خويك في المكان الفلاني أو تحدد موعد دقيق لاتصال هاتفي أو شيء من هالامور الحياتيه العاديه لكن تحديد موعد دقيق للانتهاء من برمجة برنامج وتصميمه واختباراته وآلية عمله ما أقول هذا صعب الا أقول مستحيل
لأنك جالس تعمل شيء جديد ( تبتكر أو تبدع أو تصنع ) شيء ماله وجود الا في مخيلتك !!
أنت في هالحاله تقدر تقول أتوقع بياخذ مني وقت اسبوع لكن مجرد تخمين وفي أغلب الاحيان إذا ما كان في كل الاحيان لا يصدق توقعك .
لأنك لما تبدأ تنقل العمل من مخيلتك إلى الواقع تبدأ تصطدم بأمور ما كانت على بالك ( النظريه شيء والتطبيق شيء آخر ) وتبدأ بعد ذلك التفرعات فأنت في مخيلتك ومخططك ان النقطه الفلانيه سيتم عملها بالطريقة التالية بينما في لحظة التطبيق تكتشف ان فيه خطوات إضافيه لابد من عملها ما كانت في اعتبارك وبالتالي تستهلك وقت أطول مما كنت تتوقع .
عشان كذا اقول مستحيل تحدد وقت دقيق لانجاز عمل من هذا النوع او شيء ما كان له وجود وأنت تبتدعه أو تنفذه سواء برمجه أو أي شيء ثاني في الدنيا من هذا القبيل
عموماً ياجماعة الخير الايام في عمر المواقع مثل الثواني في عمر البني آدم والحمد لله مواقعكم شغاله ومن ابدع ما يكون لاهي معطله ولاهي موقفه
هالحين صارت انفنتي 1.0.5 كخه عقب ما شفتوا اللي في انفنتي 2.0.0 ؟؟؟؟؟؟؟؟
بني آدم طمااااااااااع
تحياتي
النمط المتتابع
