يعطيك الف عافية اخوي الراسم
لو تدري عن معاناتي اتوقع بتبكي
انا عندي الان ثلاث مواقع .. اول شي بديت بموقعين وفكرت واستضفتهم في استضافة الله لا يوريك .. من جد تعبانه .. صراحة موقعي شغال دائماً وما يقفل .. بس الدعم الفني عندهم = صفر .. لدرجة ما تتخيلها .. يعني اخذوا الفلوس مني ولا عاد سمعت منهم لا حس ولا خبر .. لدرجة ان استضافتي انتهت من شهر وزيادة ولا طق لي خبر .. تصدق ارسلت له قلت له يا ابو الشباب استضافتي انتهت خلاص وقف موقعي .. ما رد علي عجبي !!
لما جيت استضيف الموقع الثالث واعتبره مهم ومتعب .. خفت استضيفه عند نفس المستضيف الاول وتركته ورحت دورت على واحد ثاني ولقيت واحد الكلام عنده عسل .. قلت يالله على بركة الله وانزل عنده الموقع .. اول اسبوع ما شاء الله تبارك الله الموقع مية المية والدعم الفني يرد عليك بالكثير خمس دقايق .. الاسبوع الثاني الموقع خربان والدعم الفني ما يرد .. في الاسبوع الثالث او الرابع الموقع صار يشتغل يوم ويخرب يوم .. طبعاً من الاسبوع الرابع لوحة التحكم ما عاد تشتغل .. تخيل ؟ قعدت شهر كامل اراسلهم ابي ادخل على السي بانل حقتي ما اقدر .. امس السيرفر طب ساكت خلاص ما عاد فيه حياة ابداً .. موقعي وشغلي وتعبي كله كله كله كله راح في الهواء
وش اسوي بس .. افضح فيه في المواقع العربية ؟ طيب وش ابستفيد ملفاتي ما راح ترجع لي .. لذلك ابحستب الاجر واببدا من جديد من الصفر
والاحراج الكبير اللي يصير انه بعض العملاء لما يطلب مني تصميم يقول لي انت تول الاستضافة وسو كل شي .. واجي انا واحط موقعه في استضافة انا واثق فيها .. ثم تخرب الاستضافة ثم يجيني العميل حق التصميم ويقول تلعب علي ؟ ليش حاطني في استضافة خربانه
واليوم صار معي موقف في الماسنجر اقسم بالله بغيت ابكي من الضحك
واحد عمره 14 سنة داخل علي ماسنجر ويقول عندي سيرفر واستضافة وكل شي .. اذا تبي استضافة ولا حركات .. قلت ايه ابشر .. اول ما ابي استضافة ابكلمك
والله ما ادري ليش قلت هالكلام بس هم في قلبي وحبيت افضفض فيه ههههههههههه
في رأيي ان الحلول للرقي بمستوى الاستضافة العربية :
1- اول شي واهم شي تأسيس منظمة قانونية تعنى بشؤن الاستضافة على الانترنت .. وعدم ممارسة هذه المهنة إلا لمن تصدر له هذه المنظمة ترخيص .. ويكون الترخيص بشروط مثل الاهلية والقدرة على ادارة استضافة .. ومعاقبة مواقع الاستضافة المقصرة ومحاسبتها قانونياً
2- مشكلتنا كل واحد فكر في مشروع نط وفتح له موقع استضافة .. والثاني يفتح له موقع استضافة .. والثالث كذلك .. طيب ليش ما هالثلاثة يتحدون مع بعض ويسون موقع واحد ويكون قوي ومؤهل افضل من انهم يتفرقون
3- تثقيف نفس المستخدم وتعليمه طرق اختيار الاستضافة المميزة عشان ما يطيح في استضافات نصب او خطط ضعيفة او مميزات ضعيفة .. لان اغلبية المستخدمين ما عندهم خبره .. ولا يعرفون ان السيرفرات تحتاج خبرة في التعامل من قبل اصحاب الاستضافات وتحتاج صيانة ودرايه
تحياتي واسف على الاطالة